എത്തിച്ചേരൽ

ആഗ്രഹിച്ചിട്ടില്ലൊരിക്കലും

വെയിലിലുരുകിയുരുകിത്തീരുമ്പോൾ

ഒരു മഴ പെയ്തിരുന്നെങ്കിലെന്ന്.

മുന്നിൽ വഴിയിരുണ്ടു തുടങ്ങുമ്പോൾ

വിളക്കുകളെല്ലാം ഒന്നിച്ചു തെളിഞ്ഞിരുന്നെങ്കിലെന്ന്.

എന്തിനെന്നറിയാതെ ഉള്ളിൽ ചിന്തകൾ കൂടു കെട്ടുമ്പോൾ

അകലത്തു നിന്നാരോ ഭൂപാളം പാടിക്കേട്ടിരുന്നെങ്കിലെന്ന്...

എന്നിട്ടും എന്തു കൊണ്ടായിരിക്കുമെപ്പോഴും

എങ്ങനെയൊക്കെ ആകരുതെന്നു കരുതിയിരുന്നുവോ

അങ്ങനെയൊക്കെ മാത്രമായിത്തീരുന്നത്‌

എവിടെയൊക്കെ ചെന്നു ചേരരുതെന്നു ഉള്ളിലുറപ്പിച്ചിരുന്നുവോ

അവിടങ്ങളിൽ മാത്രം എത്തിച്ചേരുന്നത്‌

എല്ലാം കൈപ്പിടിയിലൊതുങ്ങിയെന്നു കരുതിയൊരു നിമിഷത്തിൽ

വഴുതി വീണു ഉടഞ്ഞു പോകുന്നത്‌

(എവിടെയോ വച്ച്‌ ക്യാമറയിൽ പതിഞ്ഞത്‌)