അമ്മ(യെ നനയിച്ച) മഴ

കാട്ടിൽ പെയ്യുന്ന മഴ, വയലിൽ പെയ്യുന്ന മഴ, പുഴയിൽ പെയ്യുന്നമഴ....ഞാൻ കണ്ട മഴകൾക്കെല്ലാം ഒരു കാൽപനിക ഭാവമായിരുന്നു.
ഒരിക്കൽ അമ്മ ഞങ്ങളോടു ഒരു മഴക്കഥ ‌ പറഞ്ഞു. കുട്ടിക്കാലത്ത്‌
സ്കൂൾ വിടും നേരം അമ്മയുടെ ചങ്കിടിപ്പു കൂട്ടിയിരുന്ന ഒരു മഴയുടെ കഥ .കുടയുള്ള മറ്റു കുട്ടികൾ തുള്ളിച്ചാടുമ്പോൾ ആകെയുള്ള ഒരു പാവാട നളെത്തേക്ക്‌ എങ്ങനെ ഉണക്കുമെന്നാലോചിച്ചു കരയിച്ച മഴയുടെ കഥ . ചേമ്പിൻ താളിൽ ഒതുങ്ങാതെ പുസ്തകങ്ങൾ ആകെ കുതിർത്ത മഴ. ആ കഥ തീര്‍ത്ത കനലുകള്‍ കെടുത്താന്‍ പിന്നീട് ഞാന്‍ കണ്ട ഒരു മഴയ്ക്കുമിതുവരെ കഴിഞ്ഞിട്ടില്ല.
ഈ മണലാരണ്യത്തിൽ മായക്കാഴ്ച്ചകളുടെ പടുകുഴിയിൽ വീഴുമെന്നു തോന്നുമ്പോഴൊക്കെ പുറകോട്ടു വലിക്കാൻ എന്റെയുള്ളിൽ
ഇന്നും പെയ്യാറുണ്ടാ മഴ.
(തിരുനെല്ലി അമ്പല മുറ്റത്തു നിന്നൊരു മഴ)
കടപ്പാട്‌: അമ്മയോടോ അതോ മഴയോടൊ, എനിക്കറിയില്ല.